L’occitan s’escaufa dins la mesclanha

Aqui que las competicions venon de tornar prene en Tòp 14 e Pro D2, e semblariá que la lenga d’òc tòrne jogar sus son pròpi terren. Cal dire que lo maridatge entre aquel espòrt populari e l’occitan es evident, natural. Pr’aquò ne son venguts a se virar lo cuol, a consomar pas lo maridatge. Mas duèi aqui que s’agachan un pauc mai dins los uèlhs. Sens tirar l’uèlh de pòrc.

Coma las bascas o catalanas, las còlas occitanas de rugbí se son metudas a las colors localas. Un pauc de senhaletica, un imne per la dintrada de las còlas, un cantaire, un musicaire que fa petar una bodèga o un graile, avèm vist aquò a Pau, Castras, Besièrs, Narbona, Carcassona… A Besièrs, se son quitament trufats del CNOSF (Comité National Olympique et Sportif Français) que lor aviá fat quauquas misèrias e an fargat lo Comitat per Occitània Sens Frontièra ! A grand bruch de fèstas abans la partida, pendent e plan solide de d’aprèp. De que tornar far prene de colors al crane Besièrs de las annadas 70 !

Mas las novèlats d’aquela dintrada donc, venon de primièr de l’Estadi Tolosenc. Amb son nom, Bouscatel pòt pas èsser autra causa qu’un Occitan. Lo president de l’estadi tolosenc voliá déjà que  l’estadi novèl grandás de la Federacion Francesa de rugbí se quilhèsse en Occitània e per de que pas a Tolosa. Ara seriá pas contre un imne tot nuòu pels rotges e negres en francés e occitan. Lo Joan-Marc Leclercq que coneis plan aquel espòrt a fat una primièida prepausicion : « Per Tolosa totjorn mai ». La Veronica Antonelli acostumada a encantar los monuments e los aires a prestada sa votz.

A Montpelhièr, vòlon pas virar l’esquina a la lor identitat e puslèu la pegar sul copet. Aital òm pòt legir : « Onora ton malhòt », « Cerca l’excepcional », « Vai fins al cap ». L’espaci novèl de venda  del club se sona quitament « botiga MHR ». A Montpelhièr, vòlon pas virar l’esquina a la lor identitat e puslèu la pegar sul copet. Aital òm pòt legir : « Onora ton malhòt », « Cerca l’excepcional », « Vai fins al cap ». L’espaci novèl de venda del club se sona quitament « botiga MHR ». Ne sem pas qu’a las premícias, Occitània sedusis un pauc e concretiza, mèfi d’èstre pas cocuda !

Lo Benaset